Gjykata e Fierit ka shtyrë për më 24 qershor seancën gjyqësore për shqyrtimin e kërkesës së lirimit me kusht të ish-deputetit të Partisë Demokratike, Ervin Salianji.
Shkaku i shtyrjes ishte mungesa e raportit të vlerësimit nga Institucioni i Ekzekutimit të Vendimeve Penale (IEVP) Fier. Avokati i tij, Ledio Braho, theksoi se janë paraqitur të gjitha argumentet ligjore që mbështesin lirimin me kusht, përfshirë përmbushjen e 2/3 të dënimit dhe plotësimin e kushteve të tjera ligjore.
Salianji po vuan një dënim me 1 vit burg, i vendosur nga Gjykata e Apelit si i formës së prerë për akuzën e kallëzimit të rremë në çështjen e njohur si “Babale”.
Ai e ka konsideruar procesin të montuar dhe veten një të dënuar politik. Kërkesat e mëparshme për pezullimin e dënimit janë refuzuar nga Gjykata e Lartë.
