Apeli i Posaçëm la në fuqi dënimin që GJKKO firmosi për ish-kryebashkiakun e Lushnjes, Fatos Tushe për akuzën e deklarimit të rremë të pasurisë. Tushe ishte dënuar me 1 vit e 6 muaj burgim, që reduktohej në 1 vit për shkak të gjykimit të shkurtuar. Gjykata e Posacme urdhëroi më pas pezullimin e ekzekutimit të vendimit me burgim dhe e vendosi në provë për dy vite.
Nga hetimet e SPAK rezultoi se Tushe zotëronte në mënyrë të tërthortë një apartament në Lungomare të Vlorës me sipërfaqe 82.33 m2, për të cilin nuk ka deklaruar shpenzimet për blerjen, për punime dhe mobilimin. Gjithashtu, ai nuk ka deklaruar blerjen e dy automjeteve si dhe një borxh të marrë sipas një deklarate noteriale të 2020-ës.
Apartamenti në fjalë u konfiskua nga Apeli i Posacëm dhe u kalua në favor të shtetit. Më herët Tusha ishte dënuar për shpërdorim detyre dhe abuzime me tenderat. Ai u dënua me 2 vjet e 4 muaj burgim dhe u lirua në janar 2023.
