Qytetarët e Divjakës kanë dalë në protestë kundër propozimit për shkrirjen e bashkisë së tyre dhe bashkimin me Bashkinë e Lushnjës, një nismë që është pjesë e diskutimeve për reformën e re territoriale.
Në krye të protestës ishte kryetari i Bashkisë Divjakë, Josif Gorreja, përfaqësues i Partisë Socialiste, i cili iu bashkua kundërshtimit të qytetarëve ndaj ndryshimit të propozuar. Në tubim morën pjesë edhe përfaqësues të Partisë Demokratike, mes tyre deputetët Sajmir Korreshi dhe Brunilda Haxhiu, si dhe ish-deputetja e PD-së, Ilda Dhori.
Pjesëmarrësit në protestë argumentuan se shkrirja e Bashkisë Divjakë do të ndikonte në largimin e shërbimeve publike nga qytetarët dhe në dobësimin e përfaqësimit vendor. Ata kërkuan që Divjaka të vijojë të funksionojë si njësi administrative më vete, me vendimmarrje sa më pranë komunitetit.
