Banorët e Memaliajt kanë dalë në protestë kundër ndryshimeve të propozuara në kuadër të Reformës Territoriale, të cilat parashikojnë bashkimin e Bashkisë Memaliaj me Bashkinë e Tepelenës.
Qytetarët shprehen kundër kësaj nisme, duke argumentuar se shkrirja e dy njësive vendore do të sjellë vështirësi për banorët dhe rritje të kostove, për shkak të shtrirjes së gjerë territoriale të zonës.
Sipas protestuesve, zhvendosja e qendrës administrative dhe përqendrimi i shërbimeve vendore në një tjetër bashki do të ndikojë negativisht te qytetarët, veçanërisht tek ata që jetojnë në zona të thella dhe kanë më shumë vështirësi për të aksesuar institucionet.
Banorët kërkojnë që Bashkia Memaliaj të vijojë të funksionojë si njësi e pavarur e qeverisjes vendore, duke kundërshtuar çdo ndryshim që, sipas tyre, do të kufizojë aksesin në shërbime publike.
Kundërshtime ndaj ndryshimeve të propozuara territoriale janë shfaqur edhe në Poliçan dhe Klos, ku banorët kanë zhvilluar protesta duke kërkuar ruajtjen e bashkive të tyre.
