Para se të vijojë gara për pasuesin e Prokurorit të Përgjithshëm, Sali Berisha duket se ka bërë një zgjedhje politike me pasoja institucionale. Duke deklaruar se Partia Demokratike nuk do të bashkëpunojë me Partinë Socialiste për përzgjedhjen e emrave, kreu i opozitës praktikisht rrezikon t’ia lërë në dorë Këshillit të Lartë të Prokurorisë vendimmarrjen përfundimtare.
Në pamje të parë, deklarata e Sali Berishës është një refuzim politik për të bashkëpunuar me mazhorancën pas procesit të zgjedhjes së Avokatit të Popullit. Por në praktikë, ajo mund të prodhojë një efekt krejt tjetër: t’ia kalojë Këshillit të Lartë të Prokurorisë peshën vendimtare për zgjedhjen e Prokurorit të Përgjithshëm.
Kushtetuta parashikon që Prokurori i Përgjithshëm zgjidhet nga Kuvendi me tre të pestat e votave, mbi bazën e listës së kandidatëve të propozuar nga KLP. Nëse kjo shumicë nuk arrihet brenda afatit kushtetues, emërohet automatikisht kandidati i renditur i pari nga KLP.
Kjo do të thotë se, nëse Partia Demokratike nuk merr pjesë në krijimin e konsensusit të nevojshëm për zgjedhjen në Kuvend, mekanizmi kushtetues e zhvendos automatikisht vendimmarrjen te renditja e bërë nga KLP. Me fjalë të tjera, institucioni që Berisha e konsideron si një Prokurori të Përgjithshme të zhveshur nga kompetencat, mund të përfundojë duke mos pasur asnjë ndikim politik në zgjedhjen e drejtuesit të saj.
Nëse ky do të jetë rezultati, deklarata e sotme e Berishës nuk përfaqëson vetëm një përplasje me mazhorancën, por edhe një tërheqje të opozitës nga një prej proceseve më të rëndësishme kushtetuese, duke ia lënë praktikisht KLP-së fjalën e fundit për Prokurorin e ardhshëm të Përgjithshëm.
