Qytetarë të Rrogozhinës u mblodhën sot në sheshin kryesor të qytetit për të kundërshtuar projektin e reformës territoriale, i cili parashikon shkrirjen e Bashkisë Rrogozhinë dhe bashkimin e saj me Bashkinë Kavajë.
Gjatë tubimit, banorët theksuan se Rrogozhina përbën një nyje të rëndësishme në qendër të Shqipërisë dhe se bashkia ka rreth 22 mijë banorë, pesë njësi administrative, 28 fshatra dhe një qytet.
Pjesëmarrësit deklaruan se do të vijojnë kundërshtimin e tyre përmes një peticioni që do t’u dërgohet institucioneve shtetërore, me kërkesën që Rrogozhina të ruajë statusin e saj si bashki.
Ata i drejtuan gjithashtu një thirrje Presidentit Bajram Begaj, me origjinë nga Gosa e Rrogozhinës, që të mbështesë kërkesën e tyre dhe të ndërhyjë për mbrojtjen e Bashkisë Rrogozhinë.
