Protesta kombëtare kundër qeverisë ka hyrë këtë të diel në ditën e saj të 64-t, me dhjetëra qytetarë që u mblodhën në qendër të Tiranës për të vijuar marshimin drejt godinës së Kryeministrisë.
Me flamuj kuqezi dhe pankarta në duar, protestuesit përsëritën kërkesën për dorëheqjen e kryeministrit Edi Rama, krijimin e një qeverie tranzitore dhe mbajtjen e zgjedhjeve të reja. Marshimi u zhvillua në rrugët kryesore të kryeqytetit dhe u mbyll me fjalime përpara Kryeministrisë.
Gjatë tubimit, qytetarët hodhën parulla kundër qeverisë dhe deklaruan se protesta do të vazhdojë deri në realizimin e kërkesave të tyre. Ata thanë se protesta nuk do të ndalet derisa kryeministri të japë dorëheqjen, duke e cilësuar atë si një formë rezistence që ka delegjitimuar politikisht qeverinë.
Organizatorët theksuan se protestat do të vijojnë çdo ditë, ndërsa i bënë thirrje qytetarëve që t’i bashkohen.
