Partia Demokratike duket se po rishikon qëndrimin për bojkotin e Kuvendit, vetëm pak ditë pasi në publik u bënë të njohura mesazhet e disa deputetëve demokratë, mes tyre Jorida Tabaku dhe Bujar Leskaj, të cilët kërkonin shpjegime për vendimin e mungesës në seancën plenare të së enjtes.
Përplasjet brenda grupit parlamentar duket se kanë sjellë reflektim në drejtimin e partisë. Kreu i grupit parlamentar, Gazment Bardhi, ka njoftuar deputetët se të hënën, më 20 korrik, në orën 11:00, do të zhvillohet një mbledhje e grupit parlamentar, vetëm një orë para nisjes së seancës plenare, ku do të merret vendimi përfundimtar nëse opozita do të marrë pjesë apo jo.
Në mesazhin drejtuar deputetëve, Bardhi u kërkon atyre të jenë të përgatitur për çdo skenar.
“Të hënën, datë 20 korrik, ora 11:00 do të zhvillojmë mbledhje të Grupit Parlamentar të PD, në seli. Është caktuar seancë plenare në orën 12:00. Përgatitemi në çdo rast për seancën, që të jemi gati nëse grupi parlamentar vendos të marrë pjesë”, thuhet në njoftimin e Bardhit.
Demokratët bojkotuan seancat parlamentare që prej 2 korrikut, në të njëjtën ditë kur protestuesit qytetarë rrethuan Kuvendin. Vendimi u shoqërua me pakënaqësi brenda radhëve të opozitës, ku disa deputetë kundërshtuan lënien bosh të sallës së Parlamentit.
Ndërkohë, të hënën pritet të zhvillohet edhe protesta e radhës e qytetarëve, ndërsa Kuvendi do të mbyllë punimet përpara pushimeve verore.
Sipas të dhënave të Partisë Demokratike, gjatë këtij sesioni parlamentar opozita depozitoi 66 nisma ligjore, por asnjëra nuk u miratua nga shumica socialiste. Po ashtu, sipas demokratëve, u refuzuan 12 kërkesa për interpelancë, kryesisht me kryeministrin Edi Rama, si edhe kërkesat për ngritjen e komisioneve hetimore.
