Në vijim të veprimeve për goditjen e rasteve të kontrabandimit të sasive të mëdha të naftës, nga Tunizia drejt Shqipërisë, Policia e Durrësit në bashkëpunim me strukturat doganore dhe Guardia di Finanza ka finalizuar me sukses operacionin policor të koduar “Ari i zi 2”.
Gjatë kontrollit të anijes, në balastrat që shërbejnë për balancimin e saj, u zbuluan 400 000 litra naftë e dyshuar si e kontrabanduar nga Tunizia.
Në kuadër të këtij operacioni, u arrestuan në flagrancë 6 persona, përfshirë shtetas sirianë dhe shqiptarë:
•M. S., 56 vjeç, kapiten i anijes,
•W. B., 42 vjeç, ndihmës i oficerit të parë,
•H. B., 47 vjeç, shef i inxhinierëve,
•S. Sh., 25 vjeç, shef i ofiçinës,
•F. I., 23 vjeç, mirëmbajtës i pompave të naftës,
•N. M., 34 vjeç, oficer i parë i anijes.
Gjithashtu, u shpallën në kërkim dy organizatorët e dyshuar të këtij rasti, shtetasit J. K., 31 vjeç, banues në Tiranë, dhe S. S., 32 vjeç, banues në Durrës. Policia vijon intensivisht punën për lokalizimin dhe arrestimin e tyre.
Ndërkohë, 5 pjesëtarë të tjerë të ekuipazhit janë proceduar në gjendje të lirë, për përgjegjësinë e tyre në mirëmbajtjen e mjetit.
Materialet procedurale i janë referuar Prokurorisë për veprime të mëtejshme, ndërsa hetimet vijojnë për zbardhjen e plotë të këtij rasti të kontrabandës.
