Një vatër e murtajës afrikane të derrave është zbuluar në Malin e Rrencit, Lezhë, ku janë konfirmuar të paktën 10 raste të ngordhjes së derrave, pesë prej të cilëve në një fermë dhe pesë të tjerë në masivin pyjor të zonës.
Pas analizave të kryera nga Shërbimi i Veterinarisë në Lezhë, është vërtetuar se shkaku i ngordhjes ka qenë virusi shumë ngjitës i murtajës afrikane të derrave (ASF). Për këtë arsye, zona është vendosur menjëherë në karantinë, dhe autoritetet veterinare po kryejnë verifikime në të gjithë territorin për të parandaluar përhapjen e sëmundjes.
ASF është një sëmundje tepër e rrezikshme, e shkaktuar nga një virus i familjes Asfaviridae, që prek derrat shtëpiak dhe të egër, me një shkallë vdekshmërie që mund të arrijë deri në 100%. Virusi është jashtëzakonisht rezistent dhe mund të mbijetojë për periudha të gjata në materiale të ndryshme, përfshirë produktet e derrit. Për shembull, ai mbijeton deri në 1000 ditë në mish të ngrirë dhe deri në 300 ditë në mish të tharë ose të kripur.
Autoritetet veterinare janë në gatishmëri të plotë dhe kanë intensifikuar përpjekjet për të analizuar dhe izoluar rastet. Megjithatë, deri më tani nuk ka pasur një deklaratë publike nga Shërbimi Veterinar, pasi personeli është fokusuar plotësisht në menaxhimin e situatës.
Murtaja afrikane e derrave përbën një kërcënim serioz për fermat dhe biodiversitetin lokal, duke kërkuar masa të rrepta për frenimin e saj.
