Deputetja e Partisë së Lirisë, Monika Kryemadhi, ka hyrë në garën e përfaqësuesve të opozitës për të denoncuar e para korrupsionin në Bashkinë e Tiranës. Në një postim në Facebook, Kryemadhi shkruan se ka qenë ajo që ka lajmëruar uraganin e korrupsionit që ka përfshirë Bashkinë e Tiranës dhe qeverinë.
Ajo thekson më tej se uragani ka marrë përpara të gjithë dhe se tani ka ardhur radha e Veliajt.
“Shakaja, sado e hidhur, mbetet gjysma e të vërtetës. Por Monika ka lajmëruar e para uraganin e korrupsionit që ka pushtuar Bashkinë e Tiranës dhe qeverinë. Ky uragan, sot, i ka marrë përpara të gjithë. Edi Rama ka dashur të bëjë humor me dhimbje, por sot dhimbja e tij është e pafund, pasi lista e arrestimeve vazhdon. Citoje sërish Moniken, sepse ajo ta ka bërë benë, është radha jote.”
Kujtojmë se Monika Kryemadhi është nën hetim për korrupsion, pastrim parash dhe mosdeklarim e fshehje pasurie, duke iu nënshtruar masës së sigurisë "detyrim paraqitje", ndërsa ish-bashkëshorti i saj, Ilir Meta, ndodhet në burg për të njëjtat akuza.
