Tiranë – Kryetari i Partisë Demokratike, Sali Berisha, ka komentuar sot para gazetarëve angazhimin e Chris LaCivita, një prej strategëve kryesorë të fushatës së Donald Trump, si drejtues i fushatës së PD për zgjedhjet e ardhshme parlamentare.
I pyetur për koston e këtij bashkëpunimi, Berisha theksoi se nuk ka asnjë sekret në lidhje me marrëveshjen, por sqaroi se nuk ka qenë ai personi që është marrë drejtpërdrejt me negociatat.
“Do t’i merrni vesh që të gjitha. Nuk ka asnjë sekret. Nuk jam unë personi që jam marrë me negociatën,” – deklaroi Berisha jashtë sallës së Kuvendit, duke shmangur dhënien e detajeve të mëtejshme.
Ndërkohë, i pyetur nëse Partia Demokratike ka një kandidat të gatshëm për kryetar bashkie nëse Tirana shkon drejt zgjedhjeve të parakohshme pas arrestimit të Erion Veliajt, Berisha tha:
“PD sigurisht që do të studiojë me shumë vëmendje kandidatët e saj, por kërkon dorëheqjen e menjëhershme të Edi Ramës, i damkosur si kukulla e Sorosit.”
