Teksa mijëra qytetarë dhe aktivistë janë mbledhur për të pestën ditë me radhë para Kryeministrisë, duke protestuar kundër projektit të resortit luksoz në Zvërnec dhe duke kërkuar dorëheqjen e qeverisë, kryeministri Edi Rama ka reaguar nga Mali i Zi përmes një postimi në rrjetet sociale.
Nga Porto Montenegro, një prej projekteve më të njohura turistike në rajon, Rama publikoi një video të cilën e cilësoi si histori suksesi, duke lënë të kuptohet se nuk ka ndërmend të tërhiqet nga projekti i planifikuar në Zvërnec, pavarësisht kundërshtimeve dhe protestave që po zhvillohen prej ditësh në Tiranë dhe qytete të tjera.
Në mesazhin e tij, kreu i qeverisë krahasoi zhvillimin e Porto Montenegro me mundësitë që, sipas tij, Shqipëria ka humbur në të kaluarën për shkak të vendimmarrjeve të gabuara.
“LIVE NGA PERLA QË E SOLLËN KËTU DIKUSH QË E PËRZUNË NGA SHQIPËRIA. O çuna goca na e kaluan njëherë këta vëllezërit e vegjël topin për shalësh, për fajin e honxhobonxhove tanë që e lanë topin ta marrë deti. Po tani s’bëhet llaf më, ta harrojnë të gjithë ata që thonë s’duan apo s’na duan, se na kalon prap huq topi i historisë së Shqipërisë së Re Europiane”, shkroi Rama.
Reagimi vjen ndërsa protesta kundër projektit të Zvërnecit ka hyrë në ditën e pestë dhe po merr gjithnjë e më shumë karakter politik. Krahas kundërshtimit të investimit, protestuesit kanë artikuluar tashmë kërkesa të qarta politike, mes tyre dorëheqjen e kryeministrit Edi Rama dhe ndryshimin e kursit të qeverisjes. Në tubimin e së enjtes para Kryeministrisë janë dëgjuar vazhdimisht thirrje kundër qeverisë, ndërsa organizatorët kanë paralajmëruar vazhdimin e protestave edhe në ditët në vijim.
