Gjyshi shqiptar “ushtar” në shtëpi bari, gjykatësi: Ky biznes s’funksionon pa njerëz si ju- Me këtë titull bombastik, një pjesë e mirë e mediave shqiptare kanë përshkruar sot dramën e një shqiptari 58-vjeçar që është kapur në Angli duke kultivuar 100 rrënjë kanabis. Zenan Lleshi, që përshkruhet si “ushtar me pagesë” apo si “gjyshi trafikant,” është një nga mijëra shqiptarët që jeton në Britaninë e Madhe në kërkim të një jete më të mirë. Siç shkruan media britanike, ai ka punuar më parë në ndërtim, por nuk e ka pasur mundësinë të shlyejë shumën prej 10 mijë paund, të cilën e ka marrë borxh për të shkuar në Angli me gomone.
Ndërsa media britanike është e zellshme për të përshkruar “banditin” e radhës që vjen nga Shqipëria, çuditshëm është pasioni i madh i medias shqiptare për të përshkruar një bashkëkombas me epitete fyese dhe raciste. Ka plot raste kur shqiptarët në Britaninë e Madhe dhe jo vetëm, janë pjesë e bandave dhe trafiqeve. Ata meritojnë të jenë lajm për aktivitetin kriminal. Por të trajtosh me të njëjtin standard që trajton krerët e bandave, një shqiptar që është kujdesur për 100 rrënjë kanabis për të shlyer lekët me të cilat ka paguar trafikantët, kjo më së paku është mungesë ndjeshmërie dhe etike.
Zenan Lleshi është një shqiptar me halle dhe nuk është kapobandë apo trafikant nga ata që kanë mundësi të paguajnë që të mos ndalohen nga policia apo t’u botohet fotoja në media. Nëse britanikët kanë agjendën e tyre për të ndalur emigrimin e paligjshëm të shqiptarëve duke përdorur median e tyre, media jonë çfarë agjende ka që shndërrohet në vasale të qëllimeve të tyre? Nuk luftohet emigracioni i paligjshëm duke denigruar dinjitetin njerëzor!
