Kryepeshkopi Anastas Janullatos do të transferohet në Athinë për trajtim mjekësor. Lajmi është bërë i ditur nga media greke “Protothema”, e cila raporton se gjendja shëndetësore e Janullatosit, 95 vjeç, është e rënduar, por nën kontroll. Prej datës 30 dhjetor, ai është i shtruar në një spital privat në Shqipëri, pas një hemorragjie në stomak.
Për shkak të situatës, është vendosur që Kryepeshkopi të transportohet në Athinë me një avion të Forcave Ajrore Greke. Procesi do të kryhet nga një ekip i specializuar mjekësor i EKAV-it (Shërbimi Kombëtar i Ndihmës së Shpejtë në Greqi).
Më herët, Kisha Orthodhokse Autoqefale e Shqipërisë kishte njoftuar se Kryepeshkopi ishte shtruar në spital për shkak të një viroze sezonale dhe se gjendja e tij shëndetësore ishte e qëndrueshme.
“Fortlumturia e tij, Kryepeshkopi i Shqipërisë, z. Anastas, u shtrua në spital për shkak të një viroze sezonale, me qëllim që të jetë nën mbikëqyrjen e mjekëve. Gjendja e tij është e qëndrueshme dhe mjekët janë optimistë,” thuhej në deklaratën e Kishës.
Kryepeshkopi Anastas Janullatos i ka shërbyer Kishës Ortodokse të Shqipërisë që nga viti 1991.
