Një 19-vjeçar ka mbetur i plagosur me thikë pas një konflikti mes disa të rinjve në qytetin e Korçës. Policia ka kapur pak minuta pas ngjarjes autorin e dyshuar, një 23-vjeçar që rezulton se kishte shkelur masën e sigurisë “arrest në shtëpi”.
Ngjarja ka ndodhur pasditen e së dielës, 25 tetor, në lagjen nr. 11 të qytetit të Korçës, ku gjatë një konflikti mes disa të rinjve është plagosur me mjet prerës në kofshë 19-vjeçari me iniciale M. A.
Menjëherë pas njoftimit, shërbimet e Komisariatit të Policisë Korçë kanë ndërhyrë, duke bërë të mundur kapjen e autorit të dyshuar, 23-vjeçarit me iniciale R. I.
Sipas informacioneve paraprake, i riu dyshohet se në momentin e ngjarjes kishte shkelur masën e sigurisë “arrest në shtëpi”. Gjatë kontrollit të ushtruar nga policia, atij i është gjetur edhe një sasi lënde e dyshuar narkotike kanabis.
Ndërkohë, 19-vjeçari i plagosur është transportuar në Spitalin e Korçës, ku po merr ndihmën e nevojshme mjekësore dhe ndodhet jashtë rrezikut për jetën.
Policia po vijon veprimet hetimore për të sqaruar rrethanat e konfliktit dhe për të dokumentuar plotësisht ngjarjen.
