Hetimet për të zbuluar se si u transportuan 800 tonë mbetje toksike nga porti i Durrësit drejt Tajlandës dhe se nga ku janë marrë këto mbetje mund të shtrihen edhe në Kosovë. Ditën e djeshme Prokuroria e Durrësit e nisi procesin hetimor për kontrabandë të mallrave të ndaluara ose të kufizuara dhe shpërdorim detyre.
Një pjesë e mbetjeve dyshohet se janë marrë në Shqipëri dhe një pjesë në Kosovë. Kompania eksportuese e tyre është Sokolaj SHPK, e cila nuk iu përgjigj deri tani interesit për të sqaruar se për çfarë mbetjesh bëhet fjalë dhe ku i ka marrë ato.
Deri tani nuk është e qartë nëse në ngarkesën në fjalë ka materiale të tilla të blera nga Kurum, por kompania turke që operon në Shqipëri përjashton mundësinë që mbetjet e saj të jenë të rrezikshme. As për pjesën e ngarkesës prej 800 tonësh që dyshohet se vjen nga Kosova, nuk dihet ekzaktësisht përmbajtja apo origjina e saktë.
Dogana e Kosovës ditën e sotme reagoi për këtë skandal, duke sqaruar se eksportet e saj që vijnë ngë miniera e Trepçës nuk janë mbetje të rrezikshme.
Por zbardhja e plotë e kësaj çështjeje mund të bëhet pas ardhjen e ngarkesës në Shqipëri, pasi vetëm në këtë mënyrë do të zbulohet përmbajtja e këtyre materialeve, prejardhja dhe rrezikshmëria e tyre.
Kompanitë MAERSK dhe MSC me kontejnerët po kthehen drejt Shqipërisë në bashkëpunim me autoritetet tajlandeze.
