Një 31-vjeçar shqiptar, i identifikuar si Denaldo Maxhallaku, është gjetur i pajetë brenda një pusete kullimi në zonën e Longianos, në Itali, pas më shumë se 20 ditësh i raportuar i zhdukur.
Sipas mediave italiane, viktima dyshohet se është qëlluar disa herë me armë zjarri nga një distancë e afërt. Autoritetet kanë konfirmuar arrestimin e një personi të dyshuar për përfshirje në ngjarje.
Trupi i 31-vjeçarit u zbulua në zonën Felloniche, pasi banorët njoftuan shërbimet e emergjencës. Në vendngjarje ndërhynë zjarrfikësit për nxjerrjen e trupit, ndërsa karabinierët nisën hetimet për zbardhjen e rrethanave të krimit.
Maxhallaku, banues në Gatteo, punonte si bojaxhi dhe ishte baba i një fëmije të vogël. Ai rezultonte i zhdukur që prej 7 tetorit, kur ishte larguar nga banesa për t’u takuar me një të njohur.
Një ditë pas zhdukjes, automjeti i tij ishte gjetur plotësisht i djegur pranë zonës ku u zbulua trupi. Hetuesit kanë konstatuar gjithashtu disa gëzhoja pranë vendit të ngjarjes.
Autoritetet italiane po analizojnë pamjet e kamerave të sigurisë dhe dëshmitë e mbledhura për të përcaktuar motivin e vrasjes dhe rolin e personit të arrestuar.
