Një 30-vjecar me banim në Bulqizë merr një makinë me qira dhe niset drejt Tiranës; me një plan të qartë. Të kryente vjedhje banese. Mesa duket, i ishte kthyer në vest të vjetër, pasi edhe më herët ishte dënuar për të njëjtën vepër penale. Elidon A., sapo mbërrin në kryeqytet, “zbarkon” në rrugën Mihal Popi dhe në datën 2 gusht arrin që përmes një dritareje që ishte harruar e hapur, hyn në shtëpinë e një juristi të njohur dhe arrin të vjedhë shumën prej 10 mijë eurosh. Qetësisht, me makinën e marrë me qira ai largohet drejt shtëpisë së tij, po në Bulqizë, në qytetin e vjetër.
Pas denoncimit të juristit M.M, policia vihet në ndjekje të autorit të dyshuar dhe arrin që përmes kamerave të sigurisë të identifikojë automjetin. Policia kontakton pronarin e automjetin dhe ai rezultoi se ndodhej jashtë vendit, por në momentin, që mëson se policia po hetonte për një krim vendos të kthehet dhe të bashkëpunojë me hetuesit. Ai iu shpjegoi atyre se makinën ia kishte dhënë me qira 30-vjecarit Elidon A. këtë të fundit e fton në kafe dhe në momentin që policia i vë prangat dhe I gjen me vete shumën prej 2800 eurosh.
Policia bëri më pas kontroll në shtëpinë e tij dhe gjeti edhe rrobat që kishte përdorur ditën e ngjarjes, cka përfundimisht krijoi bindjen se ai ishte personi që kishte kryer vjedhjen në shtëpinë e juristit. Elidon A., ndodhet tashmë në qelitë e paraburgimit me masën e sigurisë “arrest me burg”, por policia ende nuk ka mundur të gjejë shumën tjetër prej më shumë se 7 mijë eurosh. Nuk dihet nëse ai i ka fshehur, apo i ka shpenzuar.
