SPAK thërret për të marrë në pyetje ish-drejtorin e OSHEE-së, Ardian Cela në kuadër të hetimeve që po kryhen ndaj Jurgis Cyrbjas, ish-deputet socialist, i cili mbahet nën arrest për korrupsion në zgjedhje dhe vepra të tjera penale. Cela do të japë shpjegime në cilësinë e personit që ka dijeni për rrethanat e hetimit. SPAK ka dyshime se i shumëkërkuari Altin Hajri dhe Edmond Koci (Mond Cekici) që më vonë u vra kanë ndikuar që emri i Jurgis Cyrbjas të ishte në listën e sigurt të kandidatëve për deputet në zgjedhjet parlamentare të 25 prillit 2021. Cela si drejtues politik i qarkut do të japë shpjegime para prokurorëve se kush e propozoi Cyrbjan. Ish-kreu i OSHEE-së ishte ftuar të paraqitej pak ditë më parë, por për shkak se ndodhej jashtë vendit e ka shtyrë paraqitjen e tij para hetuesve të BKH-së. Prokuroria e Posacme është duke hetuar për të identifikuar përdoruesit e tjerë të Sky ECC me të cilët ka komunikuar Cyrbja, Altin Hajri dhe i dyshuari tjetër Ahmet Masha.
