Gazetarja Klodiana Lala foli sot në emisionin “Open” për aplikacionet që përdoren nga grupet kriminale për veprimtaritë e tyre. Ajo theksoi se, përveç aplikacioneve të njohura si Sky ECC, EnchroChat dhe Matrix, ka dhe dy aplikacione të reja që janë aktualisht në përdorim nga kriminelët për të diskutuar aktivitetet e tyre të paligjshme.
Lala shpjegoi se këto aplikacione ende nuk janë deshifruar dhe janë të kushtueshme për përdorim. Ajo shtoi se identifikimi i përdoruesve është shumë i vështirë, pasi këto aplikacione ofrojnë nivel të lartë anonimati. Gazetarja theksoi se sfida kryesore për autoritetet është të bëjnë individualizimin e përdoruesve, pasi një adresë mund të përdoret nga disa persona, dhe identifikimi bëhet edhe më i komplikuar kur nuk ka informacione personale si foto apo detaje të tjera lidhur me individin.
Lala përmendi gjithashtu se aplikacioni "Matrix" është i fundit i deshifruar, pas “SkyECC”, “EncroChat”, “Exclu” dhe “Ghost”. Ky shërbim mesazhesh, i krijuar për kriminelët, u zbulua nga autoritetet holandeze në vitin 2021 në telefonin e një të dënuari për vrasjen e një gazetari dhe që nga atëherë ka nisur një hetim i gjerë për përdorimin e tij nga grupe kriminale.
