Prokuroria e Tiranës ka nisur hetimet për dhunën fizike ndaj Petrit Hoxhës Çakrajt brenda kafazit prej xhami në Gjykatën e Posaçme, ku ai bashkë me tre vëllezërit, Fatjon, Aleksandër dhe Kristi Bushgjokaj, po gjykohen për rrëmbimin dhe vrasjen e Renis Dobrës. Burime pranë institucionit të akuzës së kryeqytetit po hetojnë për akuzat “kanosje dhe dhunë ndaj dëshmitarit” dhe “kundërshtim të forcave të policisë”. Konfirmohet se grupi i hetimit ka sekuestruar audion e seancës dhe pamjet filmike. Hetuesit do të marrin në pyetje edhe Çakrajn, i cili u dhunua nga Bushgjokajt si dhe tre punonjësit e policisë së burgjeve që mbetën të lënduar. Vëllezërit Bushgjokaj dhe Çakraj akuzohen për rrëmbimin dhe vrasjen e 23-vjeçarit Dobra. Petrit Hoxha alias Çakraj ka dhënë shpjegime lidhur me krimin, duke implikuar vëllezërit Bushgjokaj.
