Detaje të reja kanë dalë në dritë lidhur me vrasjen e 45-vjeçarit Valter Lleshi, i cili u ekzekutua me armë zjarri mëngjesin e së hënës në zonën e Repsit, në Mirditë.
Veprimet hetimore dhe dëshmitë e mbledhura deri më tani kanë ndihmuar grupin hetimor të rindërtojë lëvizjet e viktimës para atentatit. Sipas burimeve hetimore, Lleshi kishte dalë nga banesa e tij në Rrëshen rreth orës 06:00 dhe, së bashku me një koleg pune, ishte nisur drejt kompanisë së bazaltit në Reps, ku ishte i punësuar.
Rreth dy kilometra para vendit ku ndodhi krimi, kolegu i tij ka zbritur në një lokal, ndërsa 45-vjeçari ka vijuar rrugën i vetëm. Rreth orës 07:10, ai u gjet i vrarë brenda automjetit të tij në fshatin Shkorrët, në segmentin rrugor Reps–Spaç.
Hetuesit po punojnë për identifikimin e autorëve dhe zbardhjen e motiveve të ngjarjes. Megjithatë, sipas raportimeve, Lleshi dyshohet se ka qenë i implikuar në vrasjen e Anton Kelit në Rrëshen në vitin 2020, një ngjarje që asokohe u lidh me hakmarrje për prishje të pazareve të drogës.
Valter Lleshi punonte si shofer kamioni në një kompani që merret me nxjerrjen e inerteve nga lumi Mat. Më 15 mars të këtij viti, mjetit me të cilin ai punonte iu vendos një sasi lënde plasëse, por 45-vjeçari arriti t’i shpëtonte atentatit pa lëndime.
Autoritetet vijojnë hetimet për të zbardhur plotësisht rrethanat e kësaj ngjarjeje të rëndë.
