Besojeni ose jo, në këto ditë të nxehta gushti, ish-demokrati Dashnor Sula dhe socialisti për kokë Ervin Koçi kanë vendosur të hapin një tjetër front të madh të shtetit shqiptar: luftën kundër pastrimit të parave. Dhe, sigurisht, në Shqipërinë e vitit 2026 një luftë serioze nuk mund të bëhet më pa Inteligjencën Artificiale.
Pasi u zgjidhën hallet e inspektorateve me ministren virtuale Diella dhe shteti shqiptar hyri me vrull në epokën kur algoritmet premtojnë të bëjnë atë që administrata nuk e ka bërë dot prej vitesh, radha i erdhi parave të pista.
Inspektorati i Përgjithshëm, i drejtuar nga Dashnor Sula, dhe Agjencia e Inteligjencës Financiare, e drejtuar nga Ervin Koçi, kanë nënshkruar një marrëveshje bashkëpunimi institucional për forcimin e mekanizmave të parandalimit dhe raportimit të rasteve të dyshuara të pastrimit të parave dhe financimit të terrorizmit gjatë proceseve të inspektimit.
Sipas marrëveshjes, Inspektorati i Përgjithshëm do të njoftojë menjëherë Agjencinë e Inteligjencës Financiare sa herë që gjatë kontrolleve has në fakte, të dhëna apo rrethana që krijojnë dyshime për aktivitete financiare të paligjshme.
Por pjesa më interesante është ajo që e sjell marrëveshjen në frymën e kohës.
Bashkëpunimi parashikon rritjen e kapaciteteve profesionale të inspektorëve për identifikimin e skemave të dyshimta, ndërsa Agjencia e Inteligjencës Financiare do të ofrojë materiale udhëzuese, informacion mbi tipologjitë dhe indikatorët e rrezikut dhe ekspertizë për trajnimin e strukturave inspektuese.
Dhe këtu hyn në skenë edhe Inteligjenca Artificiale, e cila po shndërrohet me shpejtësi në fjalën magjike të administratës shqiptare.
Sepse, pasi për vite me radhë kemi pasur ligje, institucione, inspektorë, drejtori, agjenci, formularë, raporte dhe strategji për të luftuar ekonominë informale dhe paratë e pista, duket se tani shpresa e re është algoritmi.
Në letër, natyrisht, marrëveshja tingëllon serioze: më shumë informacion, më shumë koordinim, identifikim më i shpejtë i rrezikut dhe personel më i përgatitur. Dhe përdorimi i teknologjisë në analizimin e të dhënave financiare është sot një instrument normal në luftën kundër pastrimit të parave.
Por Shqipëria ka një talent të veçantë për t’i dhënë teknologjisë edhe një dimension politik.Kështu, pas ministres Diella që do të modernizonte inspektimet, tani kemi Dash Sulën dhe Ervin Koçin që i bashkojnë forcat për t’u treguar parave të pista se kohët kanë ndryshuar.
Mbetet vetëm një hollësi e vogël: që Inteligjenca Artificiale të arrijë të dallojë paratë e pista atje ku inteligjenca njerëzore e shtetit shqiptar nuk i ka parë për vite me radhë.
