Gjykata e Fierit ka pranuar kërkesën për lirimin me kusht të ish-deputetit të Partisë Demokratike, Ervin Salianji, i dënuar me 1 vit burg për akuzën e kallëzimit të rremë në lidhje me dosjen “Babale”. Vendimi u mor këtë të martë pas shqyrtimit të raportit të Shërbimit të Provës dhe raportit të sjelljes nga IEVP Fier, ku vlerësimi për Salianjin rezultonte pozitiv.
Avokati i tij, Ledio Braho, kërkoi pranimin e menjëhershëm të lirimit me kusht, duke argumentuar se Salianji ka përmbushur të gjitha kushtet ligjore dhe ka kryer 2/3 e dënimit. Ish-deputeti pritet të lërë menjëherë ambientet e burgut të Fierit, ku ndodhej prej disa javësh pas dënimit me vendim të formës së prerë.
Ervin Salianji dhe Partia Demokratike e kanë cilësuar dënimin politik dhe të pabazuar në prova. Menjëherë pas lirimit, Salianji pritet të mbajë një konferencë për shtyp sot në orën 17:00 nga selia e Partisë Demokratike.
