U mbajt sot gjyqi për akuzat ndaj kryebashkiakut të Tiranës, Erion Veliaj, dhe 7 personave të tjerë të akuzuar në të njëjtën dosje. Veliaj nuk mori pjesë as në këtë seancë, por u përfaqësua nga avokati i tij, Plarent Ndreca.
Gjykata e Posaçme rrëzoi kërkesën e kryebashkiakut të Tiranës për transmetimin e drejtpërdrejtë të seancave gjyqësore, si dhe kërkesën për t’u larguar nga kafazi prej xhami. Sipas gjykatës, qëndrimi në këtë hapësirë nuk cenon asnjë të drejtë procedurale të të zgjedhurit vendor.
Në një letër drejtuar gjykatës, Veliaj argumentoi se nuk ishte zbatuar ligji lidhur me nxjerrjen e tij nga kafazi prej xhami dhe kërkoi mundësinë për të marrë pjesë në sallën e gjyqit si një person i lirë. Ai pretendoi gjithashtu se nuk i ishin vënë në dispozicion 24 fashikujt e tjerë të dosjes dhe provat digjitale.
Gjatë seancës, avokati i tij, Plarent Ndreca, përsëriti kërkesën për lejimin e transmetimit live të procesit gjyqësor.
"Kërkoj lejimin e kamerave për të regjistruar live këtë proces. Fakti që vjen në sallë një punonjëse administrative dhe pyet kush është dakord e kush jo, kjo është ndërhyrje në punët e gjykatës. Vendimmarrjen e merr trupa gjyqësore. Moslejimi i kamerave në sallë është një goditje e drejtpërdrejtë e të drejtës kushtetuese që kanë mediat për të transmetuar live", tha ai.
Ndreca kërkoi po ashtu që Erion Veliajt t’i krijohen kushtet për të marrë pjesë në gjyq jashtë kafazit prej xhami, në krah të avokatit të tij.
"Mosprezenca e tij ndikon drejtpërdrejt në proces", u shpreh Ndreca. Mbrojtësi ligjor kërkoi gjithashtu që seancat të zhvillohen një herë në dy javë, duke argumentuar se zhvillimi i tyre çdo javë nuk garanton mbrojtje efektive për shkak të afateve të ngushta.
Pretendimet e avokatit u kundërshtuan nga SPAK. Prokurori Altin Dumani deklaroi se seanca është publike dhe se në asnjë dispozitë ligjore nuk parashikohet transmetimi i saj live. Ndërsa prokurori Olsi Dado kërkoi rrëzimin e kërkesës për qëndrimin e Veliajt jashtë kafazit të xhamit.
Gjatë seancës u bë me dije gjithashtu se anëtari i trupës gjykuese, Besmir Stroka, kishte paraqitur dorëheqjen, por kjo i ishte refuzuar nga nënkryetari i gjykatës. Nga ana tjetër, avokati i Veliajt deklaroi se mbrojtja kishte kundërshti ndaj gjyqtares Flora Hajredinaj dhe se do të paraqiste kërkesë sipas ligjit.
Pasi avokatja e Ajola Xoxës kërkoi më shumë kohë për të paraqitur kërkesat, gjykata vendosi shtyrjen e seancës për më 23 qershor.
Erion Veliaj dhe bashkëshortja e tij akuzohen për korrupsion dhe përfshirje në një skemë komplekse të pastrimit të parave.
