Kreu i Grupit Parlamentar të Partisë Demokratike, Gazment Bardhi, ka reaguar pas publikimit të opinionit të Komisionit të Venecias për çështjen e mandatit të deputetes së PS-së, Olta Xhaçka. Bardhi e cilësoi raportin si një konfirmim të drejtësisë së qëndrimeve të opozitës dhe një kritikë të ashpër ndaj mazhorancës.
“Përshëndes me mirënjohje Komisionin e Venecias për opinionin profesional, i cili konfirmoi se qëndrimi i mazhorancës ishte një puç kushtetues ndaj shtetit ligjor,” deklaroi Bardhi.
Ai theksoi se Komisioni i Venecias ka evidentuar se vendimet e Gjykatës Kushtetuese duhet të zbatohen pa u kushtëzuar nga vota e mazhorancës dhe se çdo përpjekje për të penguar zbatimin e tyre përbën një shkelje të rëndë të parimit të besnikërisë kushtetuese.
Në lidhje me rastin konkret, Bardhi u shpreh: “Gjykata Kushtetuese ka marrë dy vendime, të cilat duhet të zbatohen menjëherë dhe pa diskutim. Zbatimi i këtyre vendimeve nuk mund të kushtëzohet me votimin nga shumica parlamentare.”
Ai e cilësoi opinionin e Venecias si një “shuplakë ndërkombëtare” për mazhorancën, duke theksuar se rasti i moszbatimit të vendimeve të Gjykatës Kushtetuese përmes votës politike është i paprecedentë gjatë 34 viteve të fundit.
Bardhi ritheksoi rëndësinë e respektimit të shtetit ligjor dhe ndarjes së pushteteve, duke kërkuar nga mazhoranca t’i japë fund ndërhyrjeve në vendimet e institucioneve të pavarura.
