Sot në Tiranë u zhvillua konferenca me temë: “Depolitizimi i Administratës Zgjedhore – Nevoja për Punëtorë Profesionistë Elektoralë”. Aktiviteti vjen në kuadër të përgatitjeve për zgjedhjet lokale të 11 majit dhe kishte si qëllim nxitjen e debatit mbi rëndësinë e një administrate zgjedhore të pavarur dhe profesioniste.
Në konferencë mori pjesë kreu i Komisionit Qendror të Zgjedhjeve, Ilirian Celibashi, si dhe anëtari zëvendësues i Komisionit të Venecias, Sasa Zagoec.
Gjatë fjalës së tij, Zagoec theksoi rëndësinë e depolitizimit të administratës zgjedhore dhe garantimit të një procesi zgjedhor të drejtë dhe të paanshëm. Ai nënvizoi se Komisioni i Venecias është i gatshëm të ofrojë ndihmë për përmirësimin e këtij procesi.
“Administrata zgjedhore profesioniste dhe e pavarur është thelbësore për zgjedhje të lira dhe të drejta. Është detyrë e organeve përkatëse të diskutojnë dhe të zgjidhin çështjet përpara. Shpresoj që debati i sotëm të sjellë rezultate konkrete,” tha Zagoec.
Konferenca u fokusua në krijimin e një kuadri institucional që garanton integritetin e procesit zgjedhor, duke theksuar rëndësinë e përfaqësimit të barabartë të partive politike dhe mbrojtjen e pavarësisë së anëtarëve të administratës zgjedhore.
