Korrespodenti i BBC-së në Turqi, Mark Lowen, u arrestua në Stamboll të mërkurën dhe më pas u dëbua nga vendi. Ai kaloi disa ditë në Turqi duke raportuar për protestat që shpërthyen pas arrestimit javën e kaluar të Ekrem Imamoglu, kryebashkiaku i Stambollit.
Imamoglu aktualisht ndodhet në burg për akuzat për korrupsion që ai i mohon, ndërsa ai konsiderohet si kundërshtari më i madh politik i presidentit turk Rexhep Tajip Erdogan.
Partia Popullore Republikane (CHP) e Imamoglu e ka zgjedhur atë si kandidatin e saj presidencial në zgjedhjet e vitit 2028.
“Këtë mëngjes autoritetet turke dëbuan korrespondentin Mark Lowen nga Stambolli pasi ai u ndalua në një hotel një ditë më parë dhe u mbajt për 17 orë,” tha BBC në një deklaratë.
Të enjten në mëngjes, atij iu dorëzua një dokument nga autoritetet turke ku thuhej se ai ishte dëbuar për shkak të vlerësimit se ai ishte një “kërcënim për rendin dhe paqen publike”.
“Është shumë shqetësuese që u ndalova dhe më dëbuan nga një vend ku kam jetuar më parë për pesë vjet dhe për të cilin kam një dashuri të tillë. Liria e medias dhe raportimi i pavarur janë thelbësore për çdo demokraci,” tha Lowen.
Deborah Turnes, drejtoreshë e BBC News, e konsideron dëbimin e tij një “incident jashtëzakonisht problematik” dhe shton se BBC do t’i drejtohet autoriteteve turke për këtë çështje.
Mijëra njerëz në të gjithë Turqinë u janë bashkuar protestave në rrugë dhe më shumë se 1,400 demonstrues janë arrestuar deri më tani.
Ata besojnë se arrestimi i Imamoglu është i motivuar politikisht, megjithëse Ministria e Drejtësisë thotë se gjyqësori është i pavarur.
Disa gazetarë u arrestuan, duke përfshirë një fotograf të Agence France-Presse dhe reporterë turq. Shumë prej tyre u liruan nga paraburgimi mëngjesin e së enjtes.
Aktualisht nuk po organizohen demonstrata gjatë natës, por partia e Imamoglu ka paralajmëruar një tubim të madh në Stamboll të shtunën.
