Një ngjarje tronditëse është zbardhur nga Drejtoria Vendore e Policisë Fier, ku është vënë në pranga 26-vjeçarja Emanilda Rama, e cila akuzohet për vrasjen e babait të saj, Anesti Rama.
Ngjarja ka ndodhur mbrëmjen e 23 korrikut 2025, në fshatin Frashër, ku Emanilda ka kallëzuar në polici se i ati, 56-vjeçari Anesti Rama, kishte humbur jetën aksidentalisht në banesë. Denoncimi u bë rreth orës 23:00, por hetuesit ngritën menjëherë dyshime mbi versionin e dhënë.
Pas veprimeve të para hetimore dhe analizës së deklarimeve, në bashkëpunim me Prokurorinë e Fierit, u arrit të provohet se bëhej fjalë për një vrasje të qëllimshme.
Sipas Policisë, Emanilda Rama ka mbytur të atin me një tel, për motive ende në hetim. Pas aktit, ajo dyshohet se ka bashkëpunuar me nënën e saj, Valbona Rama, 53 vjeçe, për të pastruar trupin dhe për të inskenuar ngjarjen si një vdekje aksidentale.
Valbona Rama është aktualisht e shoqëruar në ambientet e Drejtorisë Vendore të Policisë Fier, ku po zhvillohen hetime të thelluara për të përcaktuar shkallën e përgjegjësisë së saj në këtë rast.
Operacioni policor, i koduar “Inskenimi”, u zhvillua nga specialistët për Hetimin e Krimeve të Rënda, të cilët në bashkëpunim me Prokurorinë dokumentuan me prova rrethanat reale të ngjarjes dhe autorësinë e krimit.
