Në Gjykatën e Posaçme, në procesin e njohur si afera 5D, u dëgjuan dëshmitë e radhës.
Në këtë proces janë të pandehur ish-drejtorët e Bashkisë së Tiranës Redi Molla, Mariglen Qato dhe Taulant Tusha, si dhe Albano Janku, Enton Punavija, Julian Zanaj, Nestor Muhametllari, biznesmen. Qato e Molla akuzohen se kontrollonin në mënyrë të tërthortë kompaninë 5D dhe merrnin tendera nga Bashkia e Tiranës ku ishin drejtorë kryesorë.
Para gjykatës dëshmoi financierja Pranvera Shahinasi.
Dëshmia
Kam punuar në 2016-2019 si ekonomiste në shoqërinë “Igor Elektrik”.
Detyrat na i caktonte administratori Eduart Meta. Ai u zëvendësua me Nestor Muhametllari. Kam aplikuar në faqet e punësimit.
Nestorin e pata parë edhe më herët në shoqëri. Kur vinte, ai takonte administratorin Meta.
Ne merreshim kryesisht me punime elektrike.
Në shoqëri mbanim mandat pagesa, të cilët i firmoste edhe administratori.
Mariglen Qaton e njoh. Ka qenë person që ka ardhur në zyrat e shoqërisë. E kam parë më shumë se një herë. Kur vinte, takonte administratorin.
Nuk mund ta them nëse Mariglen Qato ishte ortak i shoqërisë. Në QKB ortak ishte Eduardi.
E-mailin e shoqërisë e ka përdorur më herët edhe bashkëshortja e Eduardit, pasi ishte ekonomiste.
Kur më kanë dhënë urdhra për të dërguar maile, e kam bërë. Edhe mundet t’i kem dërguar mail Mariglen Qatos.
Kur më thoshte administratori “këtë informacion do ja dërgosh filan personi”, e dërgoja.
Prokurori e njohu dëshmitaren me një akt shkresor, email që i kishte dërguar Mariglen Qatos. Ishte një listë përmbledhëse, informacion financiar i shoqërisë.
(Vijon)
