Policia e Memaliajt ka zbuluar dy armë zjarri të tipit kallashnikov të fshehura në një banesë në qytet, ndërsa ka shpallur në kërkim 20-vjeçarin Samuel Qendraj. Sipas informacioneve zyrtare, i riu i kishte fshehur armët në një çantë sportive, brenda një dhome që shërbente si magazinë, në shtëpinë e një të moshuare me probleme të shëndetit mendor.
Burimet policore bëjnë me dije se armët dyshohet se i përkisnin një grupi kriminal që operon në Memaliaj dhe në zonat përreth. Konkretisht, pistat hetimore çojnë drejt grupit të drejtuar nga Andrea Kalemi, i njohur edhe me emrin tjetër, Adriatik Kalemi – një emër i njohur për drejtësinë shqiptare dhe atë ndërkombëtare, me precedentë të shumtë penalë që nga viti 2001.
Andrea Kalemi ishte përfshirë në një ngjarje të rëndë në Belgjikë, ku u akuzua për vrasjen e dy vëllezërve shqiptarë, Mevlan dhe Adriatik Çaça, së bashku me vëllain e tij, Fatmir Kalemi.
Në vitin 2017, Kalemi u arrestua në Tiranë bashkë me dy persona të tjerë, pasi në gjendje të dehur, kundërshtuan me forcë një efektiv policie gjatë kryerjes së detyrës. Në vitin 2023, ai i mbijetoi një sulmi me thikë brenda burgut të sigurisë së lartë “Koridhalos” në Greqi, ku një i burgosur egjiptian tentoi ta vriste. Të njëjtin vit, ai u bë shënjestër e një atentati edhe në ishullin Paxos të Greqisë, ndërsa pushonte me familjen.
Saga e sulmeve ndaj tij kulmoi më 20 korrik 2024, kur babai i Andrea Kalemit, Shyqyri Kalemi, u vra në një atentat me armë zjarri. Dyshimet janë se kjo ngjarje lidhet me hakmarrjet e zinxhirit të vrasjeve që përfshijnë edhe atentatet ndaj Aleksandër Sadikajt dhe Edmond Papës.
Andrea Kalemi është kushëri i parë me Aleksandër Sadikajn, viktimë e një shpërthimi me tritol në automjetin e tij, në afërsi të Saukut në Tiranë.
Policia vijon hetimet për zbardhjen e plotë të ngjarjes dhe për kapjen e të dyshuarit Samuel Qendraj, ndërsa pistat hetimore janë të përqendruara në lidhjet e tij me grupin kriminal të Kalemit dhe aktivitetet e paligjshme në jug të vendit
