Gjykata e Athinës ka dënuar me 32 vite burg 38-vjeçarin shqiptar, Nardi Idrizi, i njohur edhe si Fatbardh Idrizi, për plagosjen e tre personave në Kretë në dhjetor 2023, pas një konflikti të çastit. Idrizi qëlloi me armë ndaj dy vëllezërve dhe një shoku të tyre, duke u larguar nga vendi i ngjarjes dhe më pas u vetëdorëzua te autoritetet greke.
Megjithatë, përmes gjykimit të shkurtuar, ai do të vuajë 20 vite burg. Viktimat nuk ishin të pranishëm në sallën e gjyqit.
Idrizi është një emër i njohur për drejtësinë shqiptare. Ai është dënuar më parë me 13 vite e 4 muaj burg për një seri veprash penale, përfshirë tentativa vrasjeje, grabitje të armatosura në banka, kazino dhe karburante, si dhe armëmbajtje pa leje. Emri i tij është përfshirë edhe në skandale me përfitime të paligjshme dënimi në burgun e Fierit.
Në prill 2024, Idrizi u shpall sërish në kërkim në Greqi për lidhje me një grup që trafikonte sende të vjedhura. Ndërkohë, në shkurt u arrestua edhe vëllai i tij, Joni Idrizi, i dënuar më parë për grabitje me armë. Vëllai tjetër, Leonard Idrizi, ka qenë pjesë e bandës së “Coles” dhe është vrarë. Pas vdekjes së tij, Nardi mori emrin Fatbardh.
