Një ngjarje e rëndë është shënuar mëngjesin e kësaj të mërkure në fshatin Arst, në bashkinë e Fushë-Arrëzit, ku një çift bashkëshortësh ka mbetur i dhunuar nga persona ende të paidentifikuar.
Sipas informacioneve paraprake, fillimisht është sulmuar Skënder Nika, i cili po kthehej nga puna drejt banesës së tij. Më pas, autorët dyshohet se kanë ushtruar dhunë edhe ndaj bashkëshortes së tij, Bardhe Nika.
Burime nga zona bëjnë me dije se motivi i ngjarjes mund të lidhet me një sinjalizim që çifti i kishte bërë policisë rreth tre javë më parë, çka çoi në zbulimin dhe asgjësimin e tre parcelave me kanabis gjatë një operacioni antidrogë.
Forcat e policisë kanë mbërritur në vendngjarje dhe kanë nisur hetimet për identifikimin e autorëve dhe zbardhjen e plotë të rrethanave të sulmit. Ndërkohë, dy të dëmtuarit janë transportuar në spital për të marrë ndihmën e nevojshme mjekësore.
