Sipas një artikulli të fundit nga “The Guardian”, qendrat e emigrantëve të ngritura në Shqipëri si pjesë e një marrëveshjeje mes qeverisë italiane dhe shqiptare janë bosh prej javësh. Shumë oficerë policie dhe punonjës socialë italianë janë kthyer në shtëpi, duke e cilësuar praninë e tyre si të panevojshme.
Artikulli thekson se vetëm 24 azilkërkues janë dërguar në qendra që nga hapja e tyre më 11 tetor, dhe shumica janë riatdhesuar për shkak të vendimeve të gjykatave që i cilësojnë ndalimet e tyre në Shqipëri si të paligjshme. Ndërkohë, partitë opozitare në Itali kanë kritikuar ashpër projektin, duke e quajtur “një katastrofë financiare” me një kosto prej rreth 1 miliard euro gjatë pesë viteve. Qendrat, të cilësuara nga Ursula von der Leyen si një model i ri për menaxhimin e migracionit, janë kthyer në simbol të grindjeve mes qeverisë italiane dhe gjyqësorit, ndërsa besueshmëria e kryeministres Giorgia Meloni është vënë në pikëpyetje.
