8.2 miliardë euro do të jetë buxheti për vitin 2025. Drafti është dorëzuar zyrtarisht në Kuvend dhe prej dy ditësh ka nisur diskutimi në komisionet parlamentare. Sipas të dhënave vitin e ardhshëm ekonomia pritet të rritet me 3.9% dhe kjo rritje të bazohet tek konsumi i brendshëm; investimet në infrastrukturë dhe ecuria e mirë e sektorit të turizmit.
Taksat Në buxhetin 2025 është parashikuar që të ardhurat të arrijmë në 754.6 miliardë lekë, me rritje 40.6 miliardë kundrejt buxhetit të rishikuar të këtij viti. Shpenzimet Vitin e ardhshëm, vit elektoral, qeveria ka parashikuar të shpenzojë më shumë. Në buxhetin 2025, shpenzimet janë parashikuar të arrijnë në total në 822.7 miliardë lekë, me rritje 51.4 miliardë kundrejt buxhetit të rishikuar të këtij viti. Fondet Prioritete pritet të fokusohen në tre drejtime kryesore: rritja e pensioneve; investimet në infrastrukturë; si dhe rritja e pagave të administratës vendore. Fushat Ministria e Shëndetësisë dhe Mbrojtjes Sociale do të marrë mbi 80 miliardë lekë, ndjekur nga Infrastruktura dhe Energjia dhe Arsimi Rinisa dhe Sporti me respektivisht 74 dhe 62 miliardë lekë. Mbi 56 miliardë lekë do të shkojnë për Ministrinë e Ekonomisë, Kulturës dhe Inovacionit, ndjekur nga ajo e Brendshme dhe Mbrojtja. Ka rritje edhe buxheti për bujqësinë që përllogaritet në 14.6 miliardë lekë, ndjekur nga Ministria e Drejtësisë që do të marrë 580 milionë lekë më pak se gjatë 2024-s. Ministrisë së Financave i alokohen 11 miliardë lekë. Bashkitë Për pushtetin vendor, konkretisht 61 bashkitë në vend planifikohet 90 miliardë lekë nga 71 miliardë lekë gjatës 2024-s. Qeveria do u japë më pak se 42 miliardë lekë njësive të pushtetit vendor, ndërsa pjesën tjetër duhet ta sigurojnë vetë.
