Pasi i mori vulën e Partisë Demokratike, Sali Berisha tashmë i kërkon Lulzim Bashës të dorëzojë dhe faqet e Facebook, Instagram dhe Tik Tok të partisë.
Nëpërmjet Sekretarit të Përgjithshëm të PD-së, Flamur Noka, i ka drejtuar një letër Bashës, ku i kërkon që të dorëzojë brenda 3 ditësh adresat në rrjetet sociale të Partisë Demokratike, si dhe të mos përdorë logon e PD-së.
Noka në letër Noka gjithashtu i kërkon Bashës që të mos përdorë asnjë aset të Partisë Demokratike, të dorëzojë llogaritë bankare në emër të kësaj partie, sikundër të mos përdorë fondet që i përkasin kësaj partie, për pagesat e zyrave me qera.
Nëse nuk merr parasysh kërkesën e tij, Noka i kujton Bashës se përballet me një kallëzim penal në SPAK.
