Kreu i Partisë Demokratike, Sali Berisha, gjatë një takimi me simpatizantët në Lezhë, ka ftuar kryeministrin Edi Rama në një debat televiziv. Ai e sfidoi Ramën që të dalin “në shesh të burrave” dhe të përballen përballë qytetarëve.
Berisha theksoi rëndësinë e lirisë së mendimit dhe kritikoi ata që nuk i lejojnë të tjerët të shprehin qëndrimet e tyre. Ai kërkoi që Rama të japë llogari për çështjet e pensioneve dhe krahasimin me vendet e rajonit.
“Hajde, urdhëro në televizion" – tha Berisha. “Hajde të shpjegojmë pse pensioni në Mal të Zi që në 2013 ishte më i ulët se në Shqipëri, sot është 450 euro. Hajde t’u tregojmë pensionistëve pse në Maqedoni dhe Kosovë pensionet janë shumë më të larta se këtu.”
Ftesa e hapur e Berishës për një debat publik vjen mes akuzave të ndërsjella mes tij dhe kryeministrit Rama. Tani mbetet për t’u parë nëse Rama do ta pranojë këtë sfidë.
