Banorët e zonës së Baks-Rrjollit, në Velipojë, kanë dalë sërish këtë të shtunë në protestë për të kundërshtuar ndërtimin e resortit turistik të biznesmenit Bashkim Ulaj në vijën bregdetare.
Të mbledhur pranë kantierit, protestuesit kanë hequr gardhin metalik dhe telat me gjemba me të cilët ishte rrethuar trualli ku po zhvillohet projekti. Siç shihet edhe nga pamjet, qytetarët kanë arritur të rrëzojnë gardhin në disa anë të perimetrit dhe të futen në brendësi të kantierit.
Gjatë protestës nuk kanë munguar tensionet me forcat e policisë, të cilat kanë tentuar të ndalojnë banorët që kërkonin të hiqnin rrethimin. Në disa momente janë shënuar shtyrje dhe përplasje mes protestuesve dhe efektivëve, ndërsa situata është bërë e tensionuar edhe brenda zonës së ndërtimit.
Banorët kanë deklaruar se nuk do të lejojnë vijimin e punimeve, duke këmbëngulur se trualli ku po ndërtohet resorti është pronë e tyre dhe se do të vijojnë rezistencën deri në zgjidhjen e çështjes.
Prej afro një viti, banorët e Rrjollit kanë ngritur akuza se dokumentacioni i pronësisë është tjetërsuar në mënyrë të paligjshme. Sipas tyre, një ish-zyrtar i Kadastrës së Shkodrës ka ndryshuar certifikatat e pronësisë, duke ia kaluar më pas truallin investitorit që po zhvillon projektin turistik në bregdetin e Velipojës.
Situata u tensionua edhe më tej në janar të këtij viti, kur firma ndërtuese nisi punimet për sistemimin e terrenit me mjete të rënda. Që prej asaj kohe, banorët kanë organizuar protesta të vazhdueshme, duke kërkuar pezullimin e punimeve dhe verifikimin e ligjshmërisë së pronës.
Sipas banorëve, çështja ndodhet në ndjekje nga Prokuroria e Shkodrës, megjithatë ata pretendojnë se ndërhyrjet në terren kanë vijuar pavarësisht hetimeve në zhvillim.
