Një aksident rrugor është regjistruar mbrëmjen e sotme në zonën e Vaqarrit, në Tiranë, ku dy automjete janë përplasur me njëri-tjetrin.
Në njërën prej makinave udhëtonte një grua shtatzënë bashkë me 6 fëmijë të mitur, të moshave nga 6 deri në 10 vjeç, të cilët po shkonin të luanin kalçeto.
Si pasojë e përplasjes, fëmijët dhe drejtuesja e mjetit kanë mbetur të lënduar dhe janë transportuar në spital, ku po marrin mjekim. Sipas policisë, fatmirësisht të gjithë ndodhen jashtë rrezikut për jetën.
Sipas informacionit paraprak, aksidenti ndodhi rreth orës 19:05, kur automjeti që drejtohej nga shtetasja me iniciale Xh. Sh. u përplas me automjetin që drejtohej nga shtetasi A. P.
Grupi hetimor po punon për zbardhjen e plotë të rrethanave të aksidentit.
