Gjykata e Posaçme ka pranuar kërkesën e Alqi Bllakos për gjykim të shkurtuar. Ish-deputeti i Partisë Socialiste akuzohet për përfshirje në aferën e inceneratorit të Tiranës, në lidhje me korrupsion pasiv në dy raste.
Gjatë hetimeve janë konstatuar veprime të kundërligjshme të kryera nga i pandehuri, në kohën kur ai mbante postin e sekretarit të përgjithshëm të Ministrisë së Mjedisit. Dyshohet se ai ka përfituar shuma financiare prej rreth 120 mijë euro dhe 7 milionë e 520 mijë lekë për llogari të Vladimir Bezhanit, përfaqësues i shoqërisë koncesionare për ndërtimin e inceneratorit.
SPAK deklaron se Bllako i ka propozuar Bezhanit të ofronte konsulencë juridike për çështjen e inceneratorit, përpara se të bëhej propozimi i pakërkuar. Po ashtu, Bllako dyshohet se i ka kërkuar Klodian Zotos të punësonte Bezhanin në atë kohë si këshilltar të jashtëm të ministrit Lefter Koka, ndërkohë që Bezhani paguhej nga shoqëria “Integrated Technology Services” sh.p.k.
Në seancën e radhës pritet që SPAK të shpallë pretencën për ish-deputetin.
