Sot, shqiptarët kudo festojnë një nga datat më të rëndësishme të historisë kombëtare – 28 Nëntorin, Ditën e Pavarësisë. Në këtë ditë, më 28 nëntor 1912, në Vlorë, Ismail Qemali dhe 39 firmëtarë të tjerë nga të gjitha trevat shqiptare nënshkruan Aktin e Pavarësisë, duke shpallur Shqipërinë të lirë dhe të pavarur nga Perandoria Osmane. Ky akt historik i dha jetë shtetit shqiptar dhe flamuri kuq e zi u ngrit në Vlorë, duke simbolizuar fillimin e një epoke të re për kombin tonë.
Udhëtimi i Ismail Qemalit drejt Pavarësisë
Udhëtimi i Ismail Qemalit për shpalljen e Pavarësisë nisi më 19 nëntor 1912 nga Triestja, duke zbarkuar më 21 nëntor në Durrës. Ai u prit nga atdhetarë të shquar, si Dom Nikollë Kaçorri, i cili më vonë do të bëhej zëvendëskryeministri i parë i qeverisë së re. Fillimisht, flamuri ishte menduar të ngrihej në Durrës më 22 nëntor, por për shkak të rrethanave politike dhe ushtarake, vendimi përfundimtar u mor që akti historik të kryhej në Vlorë më 28 nëntor.
Me aktin e Shpalljes së Pavarësisë së Shqipërisë, Kryetari i Qeverisë së Përkohshme, Ismail Qemali njoftoi gjashtë Fuqitë e Mëdha: Anglinë, Italinë, Austro-Hungarinë, Francën, Gjermaninë dhe Rusinë. Po ashtu, u njoftuan edhe shtetet ballkanike: Rumania, Mali i Zi, Serbia, Bullgaria, Greqia e Turqia, duke u kërkuar njohjen e pavarësisë, si rrjedhojë e natyrshme e vullnetit të popullit shqiptar.
Akti i Shpalljes së Pavarësisë përbën një nga ngjarjet më të rëndësishme në historinë e popullit shqiptar. Ai ishte fryt i përpjekjeve dhe i luftërave shekullore të shqiptarëve, për të mbrojtur tërësinë tokësore të atdheut dhe për të formuar shtetin e pavarur shqiptar. Me vendimin e Kuvendit të Vlorës, kombi shqiptar fitoi të drejtën e tij të pamohueshme për të qenë i lirë e i pavarur, krahas kombeve e popujve të tjerë të Europës.
112 vite krenari dhe bashkim
Sot, në këtë 112-vjetor të Pavarësisë, shqiptarët, të bashkuar në zemër dhe mendje, kujtojnë sakrificat dhe vendosmërinë e atyre që kontribuan për një Shqipëri të lirë. Kjo ditë është një simbol i unitetit kombëtar dhe i krenarisë për historinë dhe identitetin tonë. Gëzuar 28 Nëntorin!
