Për të tretën herë radhazi, qytetarët u mblodhën sot në protestë pas vrasjes tragjike të 14-vjeçarit Martin Cani, i cili u qëllua për vdekje nga një bashkëmoshatar pranë dyerve të shkollës ku të dy ishin nxënës. Protestuesit marshuan nga shkolla “Fan Noli” drejt Ministrisë së Arsimit, duke shprehur zemërimin dhe shqetësimin për këtë ngjarje që ka tronditur të gjithë shoqërinë.
Protestuesit paraqitën një sërë kërkesash, përfshirë dorëheqjen e ministres së Arsimit, zbardhjen e plotë të ngjarjes dhe vendosjen e drejtësisë për Martinin. Ata kërkuan gjithashtu masa konkrete për rritjen e sigurisë në shkolla, duke e cilësuar këtë ngjarje një kambanë alarmi për të garantuar mbrojtjen e jetës së fëmijëve.
Ngjarja e rëndë ka ngjallur reagime të shumta nga qytetarët dhe organizatat e shoqërisë civile, të cilët theksojnë nevojën për veprime të menjëhershme dhe përgjegjësi nga autoritetet përkatëse.
