Një 19-vjeçar është arrestuar nga policia pasi dyshohet se ka plagosur aksidentalisht me armë zjarri shokun e tij 17-vjeçar gjatë një feste në një banesë private.
Sipas informacioneve, ngjarja ka ndodhur rreth orës 01:40 në rrugën “Berit Beker”, pas një feste në një banesë në zonën e Sheshit Shqiponja, ku të rinjtë kishin konsumuar alkool deri në orët e para të mëngjesit.
Gjatë kohës kur po luante me një pistoletë që e mbante pa leje, 19-vjeçari dyshohet se ka menduar se arma nuk kishte fishek në fole dhe e ka shkrepur aksidentalisht, duke plagosur rëndë 17-vjeçarin në kokë.
Hetimet paraprake tregojnë se pas ngjarjes, i riu dyshohet se ka tentuar të fshehë incidentin duke e nxjerrë të plagosurin në rrugë dhe duke pretenduar se ai ishte qëlluar nga një person tjetër.
Në vijim të veprimeve hetimore, policia ka arrestuar në flagrancë 19-vjeçarin për plagosje nga pakujdesia, mbajtje pa leje të armës dhe veprime që pengojnë zbulimin e së vërtetës. Gjithashtu janë arrestuar edhe dy shokë të tij, të dyshuar për përfshirje në fshehjen e rrethanave të ngjarjes.
17-vjeçari ndodhet në spital në gjendje të rëndë shëndetësore, nën kujdesin e mjekëve, ndërsa materialet i janë referuar Prokurorisë për veprime të mëtejshme.
