Përplasja mes dy familjeve Reci e Marku në Rreshën, që dyshohet të jetë dhe motivi i atentatit të sotëm (13 janar) në Vlorë, nisi pas vrasjes së Kastriot Recit me snajper në zemër të Rreshënit, një prej krimeve më të rënda që ishte shënuar në atë zonë, por edhe më të sofistikuara.
Saimir Reci nipi i Kastriot Reci u tentua të vritej në Rreshën nga Martin Bardhi dhe pjesëtarë të tjerë të familjes Bardhi. Martin Bardhi u arrestua bashkë me të birin, për tu liruar me vonë. Por pak ditë pasi u lirua nga burgu ai u ekzekutua. Dhe i dyshuar ishte pikërisht Saimir Reci, edhe pse ndaj tij su ngrit akuzë.
Saimir Reci që i mbijetoi atentatit në Rreshën dha versionin e tij pas vrasjes së Martin Bardhit. Atë kohë ai implikonte edhe Kristin Markun alias Kristi Bardhin ne atentatin ndaj tij, ndërsa jepte alibi se nuk kishte lidhje me krimin.
“Në lidhje me konfliktin me familjen e viktimës Martin Bardhi, të ndodhur përpara disa muajsh, gjithçka ka nisur pasi ndërsa po dilja nga banesa pashë djalin e shtetasit Paulin Lleshi pranë shtëpisë time, i cili ndërsa ishte në mjetin e tij një person tjetër, po filmonte nga shtëpia ime. Gjatë këtij momenti unë i ndoqa personat e lartpërmendur dhe i ndalova në rrugë përpara kishës. Aty unë kam qëlluar me shpullë djalin e Paulinit dhe në këtë kohë reagoi personi që ndodhej në mjet me të, të cilin edhe atë e godita me shpullë. Pas rreth 30 minutash, teksa kisha dalë me automjetin tim në qytet dhe isha përballë lokal ‘Filopati’, pashë që nga një automjet ‘Audi’, zbritën shtetasit Erind Bardhi, Kristi Bardhi dhe bashkë me ta u afrua edhe babai i Rindit, të cilët mbanin pistoleta në duar. Gjatë kësaj kohe Erindi qëlloi tek xhami i mjetit tim dhe më pas edhe Kristi, ku gjatë largimit unë bëra aksident tek karburant ‘Kthella’", deklaronte Reci.
Dyshimet e familjes Reci ishin se Martin Bardhi kishte qenë informator në vrasjen e Kastriot Recit. Kristian Marku alias Kristi Bardhi që u ekzekutua sonte në aksin Fier-Vlorë në afërsi të Novoselës, dyshohet të jetë viktima e radhës e përplasjes me dy fiseve.
