Detaje të reja janë zbuluar nga hetimet lidhur me ekzekutimin e biznesmenit Bujar Nasufi mbrëmjen e së enjtes në rrugën “Myrte Zeneli”, pranë “Pallatit me Shigjeta” në Tiranë. Viktima, 56 vjeç, kishte dalë nga mobileria e tij në rrugën “Irfan Tomini” rreth orës 20:20 me automjetin e tij tip Benz ngjyrë gri, për t’u drejtuar drejt banesës.
Sipas hetimeve, autori, i maskuar dhe duke përdorur një motor, kishte ndjekur viktimën dhe e kishte pritur afër banesës së tij. Pas mbërritjes, ai qëndroi në pritë deri në momentin kur bashkëshortja e Nasufit zbriti nga makina. Në çastin që biznesmeni po parkonte, autori iu afrua dhe e qëlloi nga një distancë shumë e afërt me një pistoletë, duke lëshuar 6 plumba. Dy prej tyre rezultuan fatalë për 56-vjeçarin.
Policia po heton pistën e një konflikti për pronat si motiv të mundshëm të ngjarjes. Familja Nasufi, me origjinë nga Berati dhe rezidencë në zonën e Selitës së Vogël që prej kohës së diktaturës, zotëron disa biznese në rrugën “Irfan Tomini”. Megjithatë, familjarët kanë deklaruar se pronat janë ndarë që herët dhe nuk ka pasur konflikte mes vëllezërve.
Ndërkohë, viktima përshkruhet si një person i qetë dhe pa probleme të njohura, ndërsa policia vijon hetimet për identifikimin e autorit dhe zbardhjen e plotë të rrethanave të krimit.
