Gjykata e Apelit të Juridiksionit të Përgjithshëm vendosi të kthejë për rigjykim dosjen penale ndaj të pandehurve për vrasjen e Martin Çeços.
Sipas urdhrit të Apelit, çështja do të gjykohet nga e para në Gjykatën e Korçës, por me tjetër trup gjykues, pasi gjatë shqyrtimit të parë janë konstatuar shkelje proceduriale.
Gjykata e Korçës, me një vendim të 10 shkurtit 2025, cilësoi fajtorë dhe dënoi me 83 vite burg në total të pandehurit, kushërinjtë Valter e Edlir Molla, Bledi Angjo dhe Martina Pajollari.
Ngjarja e rëndë ndodhi më 12 qershor 2022 në Kolavec të Maliqit. Martin Çeço u gjet i mbytur me litar dhe më pas ishte hedhur në një rezervuar.
Hetimet zbuluan se autorë ishin dy kushërinjtë Molla, ndërsa bariu Angjo dhe Martina Pajollari e kishin nxjerrë në pritë viktimën.
