Gjykata e Fierit shtyn për në datën 8 korrik marrjen e një vendimi lidhur me kërkesën e ish-deputetit të PD-së, Ervin Salianji, për lirim me kusht.
Avokati i tij, Ledio Braho, deklaroi se raporti i vlerësimit nga IEVP Fier ka ardhur pozitiv, ndërsa sipas procedurës, është njoftuar Shërbimi i Provës të paraqesë raportin e saj deri në datën 8 korrik. Mbi bazën e këtyre raporteve, gjykata vendos për pranimin ose jo të kërkesës së Salianjit.
Ish-deputeti demokrat është dënuar me 1 vit burg për akuzën e kallëzimit të rremë lidhur me dosjen “Babale”. Ai, sipas drejtësisë, ka krijuar prova të rreme ndaj Geron Xhafajt, vëllait të ish-ministrit të Brendshëm, Fatmir Xhafaj.
Kjo, me qëllim nisjen e ndjekjes penale ndaj tij dhe dëmtimin e imazhit të vëllait ministër. Salianji bëri publike një video përmes së cilës pretendonte se Geron Xhafaj ishte përfshirë në trafik droge. Pas denoncimit të Salianjit, Geron Xhafaj shkoi në Itali dhe vuajti një dënim me 4 vite burgim për çështje droge.
