Policia e Dibrës ka arrestuar drejtuesin teknik të shoqërisë kineze të përpunimit të kromit "Hua Yi sh.p.k.", Admir Lala, nën dyshimet për veprën penale “Shkelja e rregullave të mbrojtjes në punë”.
Bëhet fjalë për kompaninë pranë së cilës punonte 29-vjeçari Ardit Beshiri, trupi i pajetë i të cilit ndodhet ende nën masivin e dheut që u shemb ndërsa ai po punonte me fadromë për sistemimin e mineralit të kromit. Aksidenti fatal ndodhi tre ditë më parë, por për shkak të terrenit të vështirë, trupi i të riut ende nuk është nxjerrë.
Burime nga policia thanë se pajisjet e kërkimit nuk kanë mundur të lokalizojnë vendndodhjen e saktë për shkak të masës së madhe të mineralit, dhe kërkimet deri më tani nuk kanë dhënë rezultat.
Babai i 29-vjeçarit ka bërë thirrje për ndihmë nga shteti për të gjetur trupin e të birit. Kërkimet janë ende në vazhdim.
