Erion Veliaj nuk e ka fshehur dot zemërimin për lënien jashtë loje për Tiranën në zgjedhjet e ardhshme parlamentare. Së fundmi, ndryshimet e drejtorëve kryesorë të bashkisë kanë shënuar një tjetër distancë të kryetarit të bashkisë nga përfshirja në Tiranë, duke i “prerë krahët” Ogerta Manastirliut, e cila faktikisht po e drejton e vetme fushatën e PS në Tiranë. Ndërsa një pjesë e publikut e konsideron ndryshimin e drejtorëve të bashkisë së Tiranës si një mbyllje hesapesh me të shkuarën e bashkisë, që po hetohet nga SPAK, të tjerë më afër PS-së e interpretojnë këtë si një mbyllje të rubinetit financiar për fushatën e Tiranës. Një formë presioni kjo e Erion Veliajt, po të shohësh se një nga njerëzit e tij më të afërt, Admir Abrija, një nga shtyllat financiare dhe politike të PS në Tiranë, këto zgjedhje do të jetë në Elbasan për t’i dhënë një dorë Arbian Mazniut.
Duke kufizuar financimin dhe praninë e njerëzve të tij në Tiranë, Erion Veliaj mendon dhe shpreson në uljen e numrit të votave në kryeqytet, duke ia faturuar këtë dështim Ogerta Manastirliut. Me këtë rast ai i tregon Edi Ramës se është i domosdoshëm për Tiranën. Me shpresën se mund të përfitojë një “amnisti” politike pas hetimeve nga SPAK, përfundimi i të cilave mund të shënojë edhe fundin “de facto” të karrierës së tij politike.
Për të shpëtuar nga Prokuroria e Posaçme, Veliaj ka angazhuar edhe Fatmir Xhafajn, drejtuesin e komisionit parlamentar të etiketuar “anti-SPAK”. Xhafaj nuk e ka fshehur mbështetjen e tij për kryetarin e bashkisë, duke e shfaqur këtë jo vetëm në mbledhjet e Partisë Socialiste, por edhe në aksionet parlamentare. Qartësosht, hetimet e fundit të SPAK për Veliajn dhe jo vetëm, e kanë shqetësuar së tepërmi zotin Xhafaj, duke e nxitur të veprojë shpejt dhe me nxitim për të ndryshuar ligje madje dhe Kushtetutën. Me shpresën se, duke ndryshuar rregullat e lojës, mund të shpëtojë atë që ka mbetur nga Erion Veliaj dhe karriera e tij në rënie të lirë.
